وفاة فتاة قبطية و اصابة 4 اخرون بسبب تاسوني المشرفه علي سكن الطالبات
مشكلة "سكن الطالبات" من أكبر المشاكل اللي بنات كتير بتتأذي منها .. الفتره اللي فاتت وصلتلي شكاوي كتير بخصوص الموضوع ده ..تقريبآ مفيش بنت مسيحيه ظروفها أجبرتها تعيش ف "سكن طالبات" إلا وبتشتكي من معاملة تاسوني المسؤوله عن السكن ..
وكأن كل تاسوني قاصده انها تعقد البنات اللي تحت رعايتها وتأذيهم نفسيآ وأحيانآ جسديآ .. من غير ما تلاقي اي حد يعاقبها او يقولها عيب وميصحش
النهارده في سكن مشهور في كنيسه في ايبارشية المعادي .. حصلت حادثه مؤسفه ومؤلمه .. التاسونات الفاضلات أجبروا البنات الساكنين في سكن الكنيسه انهم يجوا من بلادهم علشان يستلموا متعلقاتهم الشخصيه .. لان التاسونات عايزين يأجروا الشقق ف السكن ل بنات تانيين .. بعد وقف الدراسه في الجامعات .. طبعآ البنات رفضوا وقالوا ان صعب واحده فيهم تسافر في الظروف دي .. "ظروف كورونا" .. وان اهاليهم خايفين عليهم من المواصلات والقطر .. التاسونات أصروا ..
وقالولهم لو مجتوش تاخدوا حاجتكم هنرميها ف الشارع ..
٤ بنات قبلوا بالأمر الواقع وقرروا يسافروا من بلدهم النهارده ف عربيه علشان يخضعوا لأوامر تاسونات السكن .. لكن اللي حصل انهم موصلوش ..
العربيه عملت حادثه وبنت منهم ماتت .. والباقيين اتصابوا !
البنات دول اخواتنا وبناتنا .. البنات دول بيسيبوا بيوتهم واهاليهم وبيتغربوا بالسنين علشان يحققوا حلم ابوهم وامهم وينجحوا ف دراستهم .. مفيش واحده فيهم بتعيش ف السكن ببلاش .. بيدفعوا وبيدفعوا كتير علي فكره .. ابسط حقوقهم انهم يتم التعامل معاهم بأدميه وانسانيه .. غير مقبول وغير مسموح ان واحده معقده نفسيآ ومريضه تيجي تتحكم فيهم وتأذيهم ليل نهار .. ولما يشتكوا ميلاقوش اي رد فعل من اي مسؤول
.. لازم حادثة النهارده تبقي بدايه ل تغيير جذري في المعامله .. لازم كل "تاسوني" تعرف ان بناتنا مش عبيد عندهم .. وانهم لو مش امناء عليهم يبقي يورونا عرض كتافهم .. سيدنا البابا عمره ما يرضي باللي حصل ده وعمره ما يقبل .. انا شخصيآ هبقي وسيط واوصل صحاب البنت اللي ماتت ب سيدنا البابا .. وعارف انه أب وراعي حازم وبيخاف علي ولاده وبناته وبيهتم لأمرهم "وجربت ده اكتر من مره معاه" .. اللي غلط لازم يتعاقب .. وكل واحد لازم يعرف حجمه .. وكل واحد لازم يعرف ان فَوْقَ الْعَالِي عَالِيًا يُلاَحِظُ، وَالأَعْلَى فَوْقَهُمَا !
ذنب البنت الغلبانه اللي ماتت دي ف رقبة مين ؟!