رغم اختلاف العقيدة و الدين
فى الأول و الآخر كلنا مصريين
انا مسلم و رسولى بن عبد الله
أيوة مسلم بحب المسيحيين
المسيحى زيى بشر إنسان
ليه يتجرح و ليه يتهان
فى السلام و المحبة
اللى قالت عليها الأديان
المسيحى ده عمى و جارى
ابن بلدى و بيتى و دارى
فى فرحى بيفرح ليا
فى جرحى بيحس بنارى
عمره ما كان عليا غريب
دايما منى و الله قريب
حبل المحبة اللى بننا
أبيض صافى زى الحليب
أبونا و شيخنا بالنسبالى حياه
اللى بيحاربوا الفتنة من اى اتجاه
حكمتهم تملى سلاح
مفيش زيه لا و الف لا لا
طول ما الصليب مرفوع
الهلال بيقيد شموع
بيها ننور طريقنا
بيها منعرفش الرجوع
الكنيسة زيها زى الجامع
جرسها بيهز تملى الشارع
قوية بحب اخواتها المسلمين
اسمع يالى مش سامع
هلال صليب قرأن أنجيل
كلهم واحد مفيش بديل
مش هيفترق منهم واحد
مستحيل ابدا مستحيل
و الله المسيحيين اخواتنا
مهما اختلفت ديانتنا
هفضل دايما اقول
مش هتموت ابدا محبتنا
قبل ما اقفل الكلام
قبل النهاية و الخاتم
مسلم مسيحى واحد
ميقبلوش اى انقسام
كلمات : محمد فتحى